Հուլիսի 28՝ Վիրուսային հեպատիտների դեմ պայքարի համաշխարհային օր

Ամեն տարի հուլիսի 28-ն ամբողջ աշխարհում նշվում է որպես Վիրուսային հեպատիտների դեմ պայքարի համաշխարհային օր, որի նպատակն է բարձրացնել հասարակության իրազեկվածությունը վիրուսային հեպատիտների վերաբերյալ, խրախուսել հիվանդության վաղ ախտորոշումը, կանխարգելումն ու ժամանակակից բուժման հասանելիությունը։

Վիրուսային հեպատիտը լյարդի բորբոքային հիվանդություն է, որի հիմնական հարուցիչները հեպատիտ A, B, C, D և E վիրուսներն են։

Թեև այս վիրուսները փոխանցվում են տարբեր ճանապարհներով և ունեն տարբեր կլինիկական ընթացք, դրանցից մի քանիսը կարող են տարիներ շարունակ ընթանալ առանց որևէ ախտանիշի՝ աստիճանաբար առաջացնելով լյարդի անդառնալի վնասում։

Հատկապես B և C հեպատիտները շարունակում են մնալ լյարդի ցիռոզի և հեպատոցելյուլյար կարցինոմայի առաջացման հիմնական պատճառներից ամբողջ աշխարհում։ Սակայն ժամանակակից բժշկության հնարավորությունների շնորհիվ այս հիվանդությունների ծանր բարդությունները և հետևանքները մեծամասամբ կանխարգելելի են։

Ովքե՞ր պետք է հետազոտվեն

Հեպատիտ B-ի և C-ի հետազոտումը հատկապես խորհուրդ է տրվում՝

• Հղիներին
• Բուժաշխատողներին
• Արյան կամ արյան բաղադրիչների նախկին փոխներարկում ստացած անձանց
• Հեմոդիալիզ ստացող պացիենտներին
• Ներերակային թմրամիջոց օգտագործող անձանց
• Լյարդային ֆերմենտների (ALT, AST) անբացատրելի բարձր մակարդակ ունեցող անձանց և այլն։

Կարևոր է հիշել

Հեպատիտ B-ի դեմ կա անվտանգ և արդյունավետ պատվաստանյութ։

Հեպատիտ C-ն այսօր բուժելի հիվանդություն է, իսկ դրա վաղ հայտնաբերումը զգալիորեն բարելավում է բուժման արդյունքները։

Վաղ ախտորոշումը փրկում է կյանքեր. պարզ արյան հետազոտությամբ հնարավոր է հայտնաբերել հիվանդությունը նույնիսկ ախտանիշների բացակայության դեպքում։

Կանխարգելման հիմնական միջոցներն են պատվաստումը, անվտանգ բժշկական միջամտությունների իրականացումը, ստերիլ գործիքների օգտագործումը, դոնորական արյան պատշաճ ստուգումը և անվտանգ սեռական վարքագիծը։

Մեր ուղերձը հստակ է․ Լյարդի առողջությունը պահպանելու լավագույն միջոցներից մեկն իրազեկվածությունն է։ Եղե՛ք իրազեկ և առողջ։

«Սուրբ Գրիգոր Լուսավորիչ» բժշկական կենտրոն
ք. Երևան, Գյուրջյան 10