Հազվադեպ կլինիկական դեպք «Սուրբ Գրիգոր Լուսավորիչ» բժշկական կենտրոնում

Հիվանդությունների բուժման ժամանակակից մոտեցումները նախատեսում են թիմային աշխատանք, որն էապես նպաստում է ճշգրիտ աշխտորոշմանը և համապատասխան բուժմանը։ Սուրբ Գրիգոր Լուսավորիչ բժշկական կենտրոնում պացիենտների բուժումը կազմակերպված է հենց այս սկզբունքի հիման վրա։

Վիրաբուժական և ախտորոշիչ ծառայությունների սերտ համագործակցությունը հնարավորություն է տալիս գտնել արդյունավետ լուծումներ նույնիսկ ամենաբարդ և հազվադեպ հանդիպող կլինիկական դեպքերում։

Վերջերս բժշկական կենտրոն է դիմել 44-ամյա տղամարդ՝ դաստակի շրջանում ցավերի, մատների թմրածության և այրոցի զգացման գանգատներով, ինչն առաջին հայացքից բնորոշ է կարպալ թունելի համախտանիշին։ Սակայն, ախտորոշիչ բաժանմունքի ղեկավար Օֆելյա Ալիխանյանի կողմից իրականացված մանրակրկիտ ուլտրաձայնային հետազոտության արդյունքում բացահայտվել է նյարդաբանական սիմպտոմատիկայի իրական և հազվադեպ պատճառը։

Ուլտրաձայնային հետազոտության ընթացքում հայտնաբերվել են՝

• միջնակ նյարդի բարձր բիֆուրկացիա (նյարդի բաժանումը երկու ճյուղերի)
• նյարդի ճյուղերի միջև տեղակայված աբերանտ (հավելյալ) անոթ, որը հանդիսացել է թրոմբոզված զարկերակ և սեղմել նյարդի ճյուղերը

Հիմնվելով ուլտրաձայնային հետազոտության տվյալների վրա՝ միկրովիրաբույժներ Մհեր Սարգսյանը և Արթուր Ալավերդյանն ընտրել են բուժման համապատասխան տակտիկան։

Բուժական միջամտության ընթացքը. Հաշվի առնելով ՈՒՁՀ տվյալները՝ դասական կտրվածքի փոխարեն իրականացվել է վերքի լայնացում պրոքսիմալ և դիստալ ուղղություններով։ Դաստակի լայնական կապանը հատելուց հետո բացազատվել և մոբիլիզացվել է խցանցած զարկերակը մինչև առողջ հատվածները, որից հետո այն լիգավորվել, հատվել և հեռացվել է։ Գործընթացն ավարտվել է նևրոլիզով (նյարդի ազատում ճնշումից)։

Այս կլինիկական դեպքը ևս մեկ անգամ փաստում է, որ տարբեր մասնագետների՝ ուլտրաձայնային հետազոտության և վիրաբույժների համագործակցությունը, ինչպես նաև գործող կլինիկական ուղեցույցներին համապատասխան ախտորոշումը և բուժումը հանդիսանում են հաջողության կարևոր նախապայման։

«Սուրբ Գրիգոր Լուսավորիչ» ԲԿ ք. Երևան, Գյուրջյան 10
Մասնագիտական խորհրդատվության համար.
8603
011 60 00 03 | 044 60 03 03